КРУМІН ІВАН АНДРЭЕВІЧ

(1915-2003)

Удзельнік Вялікай Айчыннай вайны, лейтэнант.

Герой Савецкага Саюза (1943)

 Нарадзіўся 26 верасня 1915 года ў Гарадку у сялянскай сям'і. Скончыў Віцебскі кааператыўны тэхнікум. Да Вялікай Айчыннай вайны працаваў бухгалтарам у г.Тэрмезе (Узбекістан).

На фронт трапіў у лістападзе 1942 года пасля заканчэння мінамётнага вучылішча. Удзельнічаў у вызваленні Курска, Арла, Сеўска, Чарнігава, Правабярэжнай Украіны.

Камандзір мінамётнага ўзвода 43-га Даўрскага стралковага палка 106-й Забайкальскай стралковай дывізіі лейтэнант І. А. Крумін у баях за пераправу на р. Днепр праявіў мужнасць і адвагу. У выніку гераічных дзеянняў лейтэнанта І. А. Круміна артылерыя дзейнічала выдатна, агнявыя кропкі праціўніка падаўляліся своечасова, а гэта забяспечыла паспяховае фарсіраванне Дняпра і захоп плацдарма на правым беразе ракі. Званне «Герой Савецкага Саюза» было прысвоена 30 кастрычніка 1943 года.

Пасля вайны працаваў на партыйных і дзяржаўных пасадах ў Рызе.

КАРАЛЁЎ ПАВЕЛ МІХАЙЛАВІЧ

(1915 - 1998)

Удзельнік Вялікай Айчыннай вайны, маёр.

Герой Савецкага Саюза (1945).

Нарадзіўся 16 (29) ліпеня 1915 года ў в. Крыцкія Гарадоцкага раёна. Пасля заканчэння 7 класаў працаваў у калгасе, потым на Ленінградскім паравозабудаўнічым заводзе.

Удзельнік  пахода савецкіх войскаў у Заходнюю Беларусь у 1939 годзе.  У 1942 годзе скончыў армейскія курсы малодшых лейтэнантаў. Камандзір батарэі 528-га гарматнага артылерыйскага палка, капітан Каралёў вызначыўся ў баях па ўтрыманні і пашырэнні плацдарма на левым беразе р. Одэр у раёне г. Олау (Польша). Пад яго камандваннем была  арганізавана  абарона назіральнага пункта. Разлікі гармат адбілі 14 варожых атак і адстаялі плацдарм.   Званне «Герой Савецкага Саюза» прысвоена 27 чэрвеня 1945 года.

Пасля вайны П. М. Каралёў працягваў ваенную службу. Жыў у г. Вінніцы.

КАЗЛОЎ АРСЕНЦІЙ ЯФІМАВІЧ

(1919 - 1971)

Удзельнік Вялікай Айчыннай вайны, старшы сяржант.

Герой Савецкага Саюза (1945).

Нарадзіўся 23 лютага 1919 года ў в. Газьба Гарадоцкага раёна ў сялянскай сям'і. Скончыў пачатковую школу. З кастрычніка 1939 года на службе ў Чырвонай Арміі. З чэрвеня 1941 года – на фронце.

У снежні 1944 года пры фарсіраванні р. Дунай (Венгрыя) камандуючы аддзяленнем 258-га інжынерна-сапёрнага батальёна (3-ці Украінскі фронт) Казлоў А.Я.  быў паранены асколкам гранаты, аднак працягваў бой. Разам з іншымі кінуўся ў атаку і ў ліку першых уварваўся ў траншэю ворага, аўтаматнай чаргой знішчыў двух фашыстаў. 24 сакавіка 1945 года за мужнасць і гераізм Казлову Арсенцію Яфімавічу было прысвоена званне «Герой Савецкага Саюза».

 Пасля дэмабілізацыі жыў і працаваў у в. Мяжа Гарадоцкага раёна.

ДАРОШЧАНКА ІВАН ВАСІЛЬЕВІЧ

(1922-2002)

Удзельнік Вялікай Айчыннай вайны, старшы сяржант.

Поўны кавалер ордэна Славы.

Ганаровы грамадзянін г. Гарадка.

Нарадзіўся 5 мая 1922 года ў в. Дуброўкі Гарадоцкага раёна ў сялянскай сям'і. Пасля школы вучыўся ў Грозненскім нафтавым тэхнікуме, працаваў на шахтах Данбаса.

Вайну пачаў партызанам у складзе Калінінскай партызанскай брыгады. З красавіка 1944 года - ў Чырвонай Арміі. Увесь баявы шлях І. В. Дарошчанкі прайшоў ва ўзводзе разведкі 14-га стралковага палка 72-ой стралковай дывізіі. Ваяваў на Ленінградскім і 1-м Украінскім франтах. Ордэнам Славы III ступені (1944) узнагароджаны за мужнасць і адвагу, праяўленыя ў перыяд фарсіравання р. Сястра (Ленінградская вобласць).Ордэнам Славы II ступені (красавік 1945) - за ўдзел ў баях за вызваленне г. Нейсе (ПольшчаОрдэнам Славы I ступені (май 1945)  - за ўдзел ў баях за населены пункт Цабтен (Польшча). Удзельнік Парада Перамогі ў Маскве 24 чэрвеня 1945 года.

Пасля вайны жыў у Гарадку.

ГАПЯЁНАК МІКАЛАЙ ІВАНАВІЧ

(1919 - 2008)

Удзельнік Вялікай Айчыннай вайны, гвардыі палкоўнік.

Герой Савецкага Саюза (1945).

Кандыдат ваенных навук (1960).

Нарадзіўся 17 красавіка 1919 года ў в. Глінішча Гарадоцкага раёна.

Скончыў Балашоўскую ваенную авіяцыйную школу пілотаў. З 1941 года – у Чырвонай Арміі. Прайшоў шлях ад лётчыка на бамбардзіроўшчыку да камандзіра эскадрыллі 81-га гвардзейскага Кракаўскага бамбардзіровачнага авіяпалка.

Прымаў удзел у прарыве блакады Ленінграда, у бітве пад Курскам, у Берлінскай і іншых аперацыях. За гады Вялікай Айчыннай вайны  зрабіў 198 баявых вылетаў.                              Званне «Герой Савецкага Саюза» прысвоена 27 чэрвеня 1945. Удзельнік Парада Перамогі ў Маскве 24 чэрвеня 1945 года.

У пасляваенны перыяд працягваў службу ў Ваенна-паветраных сілах, працаваў выкладчыкам у Ваенна-паветранай акадэміі імя Ю. А. Гагарына. Жыў у п. Моніна Маскоўскай вобласці.

                                                                                             БУМАГІН ІОСІФ РАМАНАВІЧ (1907-1945)

Нарадзіўся 8 кастрычніка (17.10.) 1907 г. у Гарадку ў сям’і рабочых. У 1937 годзе пераехаў у г. Бірабіджан Хабараўскага края. Скончыў ваеннае пяхотнае вучылішча ва Уладзівастоку.

У дзеючай арміі з 1941 года. У якасці камандзіра кулямётнага ўзвода 396-га стралковага палка стаў удзельнікам  шматлікіх баёў. У адным з іх, пры штурме польскага горада Брэслау (Вроцлаў) 24 красавіка 1945 года,  лейтэнант І.Р. Бумагін здзейсніў подзвіг: закрыў сваім целам варожую куляметную агнявую кропку. 

Званне Героя Савецкага Саюза прысвоена 27 чэрвеня 1945 года (пасмяротна). Пахаваны ў горадзе Вроцлаў (Польшча).

БАГДАНАЎ РЫГОР БАГДАНАВІЧ 

(1910-1943)

Удзельнік Вялікай Айчыннай вайны, старшы лейтэнант.

Герой Савецкага Саюза (1943).

Нарадзіўся ў 1910 годзе ў в. Марцюшы Гарадоцкага раёна ў сялянскай сям'і. З 1932 года – у Чырвонай Арміі. У 1938 годзе скончыў курсы малодшых лейтэнантаў. З 1941 года – удзельнік Вялікай Айчыннай вайны.

Гвардыі старшы лейтэнант,  камандуючы батальёнам 385-га стралковага палка (Цэнтральны фронт),  вызначыўся пры фарсіраванні Дняпра. 24 верасня 1943 года байцы батальёна пераправіліся на правы бераг і захапілі два населеныя пункты. Утрымліваліваючы іх да падыходу асноўных сіл палка, батальён пад камандаваннем Р. Багданава адбіў 10 атак ворага. У хуткім часе на дапамогу прыйшлі воіны іншых батальёнаў палка і стойка абаранялі заняты плацдарм. 1 кастрычніка 1943 года, адбіўшы контратаку ворага, Рыгор Багданаў быў смяротна паранены.

АНАНЬЕЎ МАРТЫН АЛЯКСЕЕВІЧ

(1900-1982)

Удзельнік грамадзянскай вайны.

Удзельнік Вялікай Айчыннай вайны, старшы лейтэнант.

Герой Савецкага Саюза (1944).

Нарадзіўся ў 1900 годзе ў былой в. Ісайкі Гарадоцкага раёна ў сялянскай сям'і.

У арміі з 1919 года. Удзельнік грамадзянскай вайны. Удзельнік Вялікай Айчыннай вайны. На фронце з лютага 1942 года.

Пры фарсіраванні Дняпра 27 верасня 1943 года камандзір кулямётнага разліку Мартын Ананьеў з групай байцоў  ў ліку першых пераправіўся на правы бераг ракі. Усю ноч пехацінцы адбівалі атакі ворага, тым самым садзейнічалі пашырэнню захопленага плацдарма. Кулямётчык Ананьеў асабіста знішчыў каля 70 гітлераўцаў.

Указам Прэзідыума Вярхоўнага Савета СССР ад 3 чэрвеня 1944 года за ўзорнае выкананне баявых заданняў і праяўленыя пры гэтым гераізм і адвагу старшаму сяржанту Ананьеву Мартыну Аляксеевічу было прысвоена званне «Герой Савецкага Саюза».

Пасля  вайны жыў і працаваў у г. Таганроге  Растоўскай вобласці.